Cunigghiu all'agruduci

Cliccate qua per la versione italiana di questo post.

Click here for the English version of this post.

Alimena (PA)

’Sta ricetta la fannu ad Alimena, ed iu vi la passu tali e quali.

Prima: unu o dui cunigghi assecunnu la grussizza.  Lavatili, tagghiatici la testa, li pedi e svudiddàtili e faciti li porzioni senza sbagghiari.

Secunnu: priparati ’na marinata fatta cu cipudda tagghiata, dui pampini d’addauru, un ciuffiteddu di rosmarinu, ’n’anticchia di sali, qualchi cocciu di pipi nivuru, mezzu bicchieri d’ogghiu d’oliva di paisi e dui bicchieri di vinu russu e beddu siccu.  Faciti vugghiri lu tuttu pi qualchi minutu, scinniti e lassati ripusari.

Terzu: a marinata fridda, pigghiati li porzioni di cunigghiu e calaticcilli dintra aspittannu pi dui uri abbuccateddi.

Quartu: pigghiati un tianu beddu granni, mittitici dui beddi cucchiari di struttu, tagghiati ’na cipudduzza e facitila suffriiri ddà dintra.  Nni lu stessu mumentu pigghiati la carni, sculatila, asciucatila, passati li porzioni nni la farina e mittitili dintra lu tianu facennuli rusulari cu la cipudduzza.  Junciti sali e pipi e, a puntu giustu, sbarrati la marinata culata dintra lu tianu e faciti cociri a focu lentu.

Quintu: dintra ’na cazzarola smaltata, stimpirati un cucchiaru di zuccaru, ’nzemmula a mezzu bicchieri di acitu biancu e sbarrati tutti cosi supra la carni, juncennu un pugnu di pignola e di uva sultanina allivisciuta dintra l’acqua tiepida, mittitici puru 100 grammi di olivi bianchi sminuzzati e, a ’stu puntu, aisàti lu focu e, quannu l’acitu sarà quasi tuttu svapuratu, scinniti lu tianu e si siti boni, ’na vota assittati cu lu piattu sutta lu nasu, lassatini ’n’anticchia, si putiti.

Un cunigghiu sicilianu, a Liunforti (EN).