domenica 22 marzo 2015

Palomma 'e notte

Grandissimo, questo! Grandissima poesia dal grandissimo poeta Salvatore di Giacomo, musicata dal grandissimo Francesco Buongiovanni, interpretata dal grandissimo tenore villaricchese, Sergio Bruni.


Tiene mente ’sta palomma,
Comme ggira, comm’avota,
Comme torna ’n’ata vota
’Sta ceroggena a tentà!

Palummè, chist’è ’nu lume,
Nun è rosa o giesummino,
E tu a fforza ccà vvicino
Te vuò mettere a vulà!

Vattenn’ ’a lloco!
Vattenne, pazzarella!
Va’, palummella, e torna,
E torna a ’st’aria
Accussì fresca e bella!
’O bbì ca i’ pure
Mm’abbaglio chianu chiano,
E ca mm’abbrucio ’a mano
Pe’ te ne vulè caccià?

Carulì, pe’ ’nu capriccio,
Tu vuò fà scuntento a ’n’ato
E po’, quanno ll’hê lassato,
Tu addu ’n’ato vuò vulà.

Troppe core staje strignenno
Cu ’sti mmane piccerelle;
Ma fernisce ca ’sti scelle
Pure tu te può abbrucià.

Vattenn’ ’a lloco!
Vattenne, pazzarella!
Va’, palummella, e torna,
E torna a ’st’aria
Accussì fresca e bella!
’O bbì ca i’ pure
Mm’abbaglio chianu chiano,
E ca mm’abbrucio ’a mano
Pe’ te ne vulè caccià?

Torna, va’, palomma ’e notte,
Dint’a ll’ombra addò sì nata!
Torna a ’st’aria ’mbarzamata
Ca te sape cunzulà!

Dint’ ’o scuro e pe’ me sulo
’Sta cannela arde e se struje,
Ma c’ardesse a tutt’ ’e dduje,
Nun ’o ppozzo suppurtà!

Vattenn’ ’a lloco!
Vattenne, pazzarella!
Va’, palummella, e torna,
E torna a ’st’aria
Accussì fresca e bella!
’O bbì ca i’ pure
Mm’abbaglio chianu chiano,
E ca mm’abbrucio ’a mano
Pe’ te ne vulè caccià?
Foto: crazycompany.it

Nessun commento:

Posta un commento